媽媽斥鼓吹虐兒教育 「意見不合一槍打埋去？」

「你同仔女有唔啱意見嗰時，唔通你就係一槍打埋去？」母親洪曉嫻，說起前日林鄭月娥的母親論，仍非常氣憤。

前晚聽見林鄭的母親論，她第一反應是覺得很惡心，洪曉嫻認為人民和政府的關係本身不是母子關係，而是人民授權給政府去管理這個地方；然而，林鄭回應人民訴求的姿態，卻是「我係阿媽，我係高高在上，我係絕對正確」，令她覺得非常嘔心。

身為母親，洪曉嫻很想反問林鄭是否鼓吹虐兒的教育方式，「當我哋𠵱家都係講緊子女同父母之間係要有一個較平等嘅關係，子女同父母如果意見相左嗰陣，唔係應該要好好哋大家一齊去討論、開家庭會議，或者互相理解同接納彼此嘅差異咩？但林鄭唔係，你同仔女有唔啱意見嗰時，唔通你就係一槍打埋去？一巴摑落去？」

「警察唔係趕人，係報復」

她認為，警方無論如何也不應向市民開槍，何況據她現場觀察，昨日是各階層的示威者也有，而年輕人是佔大多數，她一直在添美道與夏慤道交界位置，看見市民只是在集結，沒有武器在身，即使出了狀況，也只是在叫喊「雨傘、頭盔、生理鹽水」等防護性用具。

後來，她在天橋見證衝突發生，看見警察向示威者噴催淚水的方式就像噴殺蟲水一樣，見人就噴，所有人都是兵荒馬亂、四圍逃竄的狀態，而回家後再看示威片段，見警察的開槍行為更會搞出人命，「我覺得開槍根本係警察有報復成份，佢唔係為咗驅趕人，佢係為咗報復，報復當年傘運時我哋佔據咗街道，報復我哋將朱經緯、將七警拉上法庭，我覺得根本係一個與民為敵嘅表現」。