【建制派已惹上殺身之禍！】

【建制派已惹上殺身之禍！】
有無發覺建制派今日完全唔敢出聲？皆因佢地見過12/6的衝突，已經知道今次嘅群眾，係一班覺得面臨絕望，而要誓死反抗，唔再係以前泛民所控制果種和理非非遊戲，由03年向議員丢飲管，今時今日分分鐘變成飛鐵通。落場見過佢地既決心及行動力，連我呢啲落開場同理念相近嘅老嘢都嚇親，何況係處於對立面嘅建議中人？

而問題核心係｢逃犯修訂條例｣，好多人以為係逢建制大圈子必定支持，但實情係佢地個圈部份人都有所顧忌，商界就公然驚到出面了，同得大陸做生意都係高危一族；而部份建制圈的人其實都經營唔少灰色事業，基本上大陸風向一變而嚴正執法的話，起碼七成人都會中招。但因為港中兩地無司法引導，就算大陸有咩行動，只要自己唔響大陸就安全，大不了就響香港避風頭、疏通吓、甚至等待換咗個領導，絕對有位走盞。但新例一出，佢絕對有能力上午響大陸審理完，然後就要港府夜晚捉人，你連著草嘅時間都無，到時順手凍結埋你戶口，想老婆仔女夾錢走都唔得。所以有得揀的話，唔少建制派都唔想呢個修訂通過，以免圈內朋友、支持者受害。
當呢幾日有不只一單，對林鄭及其他疑似幫凶嘅高官作出死亡恐嚇，本身諗住做埋呢兩年嘅議員當然唔想搏，其他建制議員亦身驕肉貴，覺得無謂乸屎上身。所以星期三至費事返去開會及出聲，以免未入到去就俾人拉出黎公審同跪玻璃。當然，話唔定好快就有人為搏上位，或者受主子壓力而要發聲明。若最後令修例三讀通過，恐怕某啲勇武嘅香港人會終身追殺佢地，到時有咩山高水低，就記住多謝林鄭咁好帶挈。