我尋晚係唔可以面對我自己嘅哥哥，我係要將屋企所有關注警察嘅相、我好proud of嘅相，全部收晒佢，亦都唔敢再同人講我屋企以前係咁多警察。

經歷過尋日警察以催淚彈、布袋彈、橡膠子彈對付群眾後，相信唔少香港人都相當難過，今朝不少聽眾喊住打來講佢嘅感受，如果你係香港人，你一定明佢哋講咩。
洪小姐：

而家林鄭……我而家係跪喺度求你一件事，作為一個警察、前警察家族嘅親人，我求下你放過我哋。14年嘅佔領行動，我阿哥…我阿哥佢真係一個好警察，但佢係藍絲，比親人朋友排擠，我勸佢哋：「唔好啦！我阿哥…我阿哥好警察，佢只係做佢份工。」我同自己講三成警察都係好人，而家我講一成警察都係好人，但係尋晚我見到啲警察，向啲後生細路啲頭開槍，係咁發癲放催淚彈，我唔可以再叫佢哋做警察，而家我要改口叫佢哋公安。我尋晚係唔可以面對我自己嘅哥哥，我係要將屋企所有關注警察嘅相、我好proud of嘅相，全部收晒佢，亦都唔敢再同人講我屋企以前係咁多警察。我而家好矛盾，因為我做緊份工就係幫助緊警察嘅細路，我都考慮緊仲好唔好做呢份工。唔該你林鄭，有啲警察唔係想、想做你要想佢做嘅嘢㗎，唔該你唔好逼到我哋咁慘啦！

邊一幕你自己最心痛？

係啲警察，用支槍平射嗰啲市民呀！佢哋手無寸鐵㗎！佢哋有啲甚至係做和平示威喳！係咁發癲咁放催淚彈，係好離譜呀！唔該你為吓我哋，已經搞到有時我哋啲親戚朋友…我嗰陣時好慘呀！擺酒唔叫佢㗎！佢犯咗咩事呀？佢從來無開槍射過一個市民，佢真係一個好警察嚟㗎！但係我哋都明白點解啲人咁對佢，因為佢藍絲呀！因為佢思想覺得佢哋做得啱呀！